O martes 21 de maio, logo da resaca do Día das Letras, teremos canda nós tres poetas ben diferentes entre si para armar unha sesión RARA. Coma sempre, agardámosvos ás 21 h. no Modus Vivendi.
Luz Pichel (Alén, Lalín)
Licenciada en Filoloxía Hispánica e profesora de ensino medio en Alcobendas, Madrid, onde reside desde o ano 1971, aínda que sempre se aproveitou do contacto abondoso coa súa aldea. É autora de libros de poesía en lingua castelá e en lingua galega; entre eles, El pájaro mudo (Premio “Ciudad de Santa Cruz de la Palma”), La marca de los potros (XXIV Premio hispanoamericano de poesía Juan Ramón Jiménez); Casa Pechada (XXVI Premio Esquío de Poesía en lingua galega).
Casa pechada ven de reeditarse na colección diminutos salvamentos da ed. Progresele co título Cativa en su lughar/casa pechada: o libro orixinal vai precedido dunha versión moi libre, antolladiza e en diálogo co orixinal, escrita desde o castrapo de Alén, entendido como segunda lingua dorida dun lughar, o seu, onde acotío se fala un galego ben coidado e benquerido.
María Lado
Naceu nun 124 dun taxista de Cee camiño do hospital no
1979. Comezou a escribir co Batallón Literario da Costa da Morte, onde participou das tres antoloxías editadas do colectivo.
Ten publicado cinco títulos individuais de poesía: A primeira visión (Letras de Cal, 1997), casa atlántica casa cabaret (Xerais, 2002), berlín ( 2005), tamén en edición dixital e formato audiolibro musicado por Fanny e Alexander, nove (Edicións Fervenza,2009) Amantes (Caldeirón, 2011).
Participou en incontables revistas, volumes colectivos e antoloxías.
Destas últimas salienta, pola súa importancia, D’efecto 2000 (Letras de Cal, 1999), o volume 25 anos de poesía galega 1975-2000
editada pola Voz de Galicia (2003), As sonorosas cordas (Eneida, Madrid, 2005), o volume Por man propia (Bourel, 2005) e a antoloxía de poetas irlandesas e galegas To the winds our sails (Salmon Poetry, 2010).
Textos seus foron traducidos ao castelán, portugués, catalán, ruso,
irlandés e croata. Vive de recitar e para saber máis dela é bo preguntar. Tamén vale investigar no Google.
Séchu Sende (Padrón, 1972)
Iniciouse como poeta vinculado ao Colectivo Poético Serán Vencello, formando parte da xeración dos 90 e máis tarde revelouse tamén como un dos narradores de principios do século XXI. Foi un dos fundadores do proxecto editorial Letras de Cal, no que publica o seu primeiro libro Odiseas en 1998. Licenciado en Filoloxía Galego-Portuguesa, como sociolingüista foi cofundador da Cooperativa Tagen Ata, Lingua e Comunicación. En 2003 gaña o Premio Blanco Amor coa novela Orixe. O seu libro de conxunto de relatos curtos Made in Galiza (2007) recibiu o Premio Anxel Casal ao Mellor Libro do Ano, concedido pola Asociación de Editores Galegos e foi traducido ao curdo e ao turco pola editora Avesta, e ao euskera pola editorial Txalaparta.
No ano 2010 publicou o libro ilustrado Animais, un conxunto de textos e deseños que forman un himno á vida natural e unha denuncia do progreso mal entendido, desde múltiples rexistros, desde a ironía e o humor até o surrealismo. En 2011 publicou O caçador de bruxas, unha historia sobre a liberdade de expresión, o galego exiliado Milo Chaos e o paraugas de Dancing in the rain. A súa última obra, autoeditada, é Viagem ao Curdistám para apanhar estrelas, un libro de viaxes ilustrado polo autor onde se narra unha aventura autobiográfica no Curdistán norte, no estado turco, cunha aproximación ás emocións e ás experiencias do pobo curdo e ao seu conflito sociolingüístico.
Ten traballado en publicidade social e, neste campo, entre as súas creacións está a campaña para a Universidade de Vigo “Busco amante galego-falante”, lema que popularizou nun tema rock o grupo musical Sacha na Horta. Un dos seus versos, “Eu nunca serei yo”, foi transformado en tema punk polo cantautor O Leo i Arremecághona!.
Séchu Sende tamén é o creador do primeiro xogo de rol en galego, publicado polo Concello de Santiago e a Asociación Socio-Pedagóxica Galega, como actividade de dinamización do Correlingua, en 2002. Tamén é domador de pulgas no Circo de Pulgas Carruselo, máis coñecido como Galiza Pulgas Circus. Actualmente é profesor de lingua e literatura galega no IES Marco do Camballón de Vila de Cruces.
