Botamos ao aire a folla volandeira dos Nocturnos, con textos de Ada Salas, Medos Romero, Uxío Novoneyra, Paul Celan, Baldo Ramos, Ana Becciú, Otto-Raúl González, José Tolentino, Miguel Anxo Fernán-Vello.
Con nocturnidade e aleivosía emprazámosvos para mañá, ás 21.00 h. no Modus Vivendi, con Manuel Darriba, Clara Gayo e Celso Fernández Sanmartín. Chao!
Caminhei sempre para ti sobre o mar escrespado
na constelação onde os tremoceiros estedem
rodas de aço e charcos
no seu extremo azulado
Ferrugens cintilam no mundo,
atravessei a corrente
unicamente ás escuras
construí minha casa na duraçao
de obscuras línguas de fogo, de lianas, de líquenes
A aurora para a qual todos se voltam
leva o meu barco da porta entreaberta
o amor é unha noite a que se chega só
José Tolentino Mendoça (A noite abre meus olhos. Poesía reunida, Assírio & Alvim)
A ilustración é de Alberto Vázquez.
Velaquí a folla volandeira do Picaversos Adictos. Con Miriam Reyes, Gonzalo Hermo, Clarice Lispector, Guillaume Apollinaire, Georges Trakl, Bukowski, Maite Dono, Lupe Gómez e Herberto Helder.
Agardámosvos mañá con Gonzalo Hermo, Maite Dono e O Leo i Arremecághona e con quen eles queiran traer…
Vladimir Holan, Felipe Zapico, Víctor Díez, Pilar Pallarés, Marcos Lorenzo, Maiakovski, Berta Piñán e Gary Snyder enchen a folla volandeira que fixemos para a sesión dos Picaversos Salvaxes.
Que a gocedes, salvaxemente.
Gamoneda, Adrienne Rich, Outeiriño, René Char, Herberto Helder, Manuel Cortés, Katheleen Raine, María Elena Cruz Varela, Clarice Linspector e Luis Pimentel conforman a folla volandeira que preparamos para a sesión d@s “Mític@s”.
Como xa sabedes, mañá ás 21.00 h. no pub Modus Vivendi Estíbaliz Espinosa, Manuel Outeiriño e Manuel Cortés desvelarannos e lerán as súas escollas “míticas”. A cousa promete… Vídevos!
O PANDEXEIRO SECRETO
Primeiro faime masa.
Como sabe que son liquefacta
aprovéitase do meu peito quente
e engade fariña.
Fariña moi branca espolvorexada e candeal,
varios quilos.
Auga dos regos internos emplumada coma o xéiser,
varios litros.
Amásame
mentres eu a dar voltas e máis voltas
e río a treu de verme así
abrazada por estas ganas de darme forma e quentura
penetrándome
a me remexer
na artesa dun devezo artesán polo que me estendo
coma pandemia e almo
que fora nutrir un reino de mil fames.
E canto me prace
a coberta
da súa
temperatura animal
o seu fermento
a me inflar ionosferas
a me espoldrexar coma ave nun paraíso estremo
baixo as súas mans
o lévedo medra poderoso coma un lobo nas escuras
ao seu requento
polarizo luz.
Un milagre de codia dourada sóbeme polo corpo arriba
a chamarme “pandora, aínda estás ardendo”
i eu fumego de riso e farangullas
cando el tén a ben retirar cada man
dos farallóns dos meus peitos
convertidos xa para sempre en pan
EN PAN
pois alimentalo da totalidade
pandemeu
é para o que estou feita
imperfeita pandora de pan dourado
dona da caixa dos ventos
que xiran e xiran nos brazos
do seu muíño de pan
(para todo iso
e para me devorar no almorzo
cun pouco leite)
Estíbaliz Espinosa, Pan (libro de ler e desler)
Aquí a folla volandeira da sesión dos SOÑOS. Vémonos mañá!
Só oS
SoñoS
Nos soños soños soN.
Gonzalo Navaza, A torre da derrotA
Mentres agardamos pola velada deste martes 20 de decembro aquí vos deixamos a folla volandeira dedicada a Lois Pereiro cunha pequena selección de poemas…
Et voilá: para abrir boca aí vos vai unha folla volandeira cargada de música. Nada que ver co que acontecerá este martes, coma sempre ás 21.00 h. no Modus Vivendi durante a sesión d@s Músic@s…
Porque disque Deborah Vukusic, Carlos Santiago e Snob Megalove andan a argallar moito máis que un recital poético. Ídelo perder?
Foto de Pelare
Fotografía de Olalla Lojo
Aquí vos deixamos a terceira folla volandeira de PICAVERSOS, a nosa escolla de poemas INOCENTES. Son estes, pero poderían ser outros… O blog está aberto á vosa participación e ás vosas suxestións.
Ata mañá, ás 21.00 h. no Modus, con Pepe Cáccamo, Dores Tembrás e Nuria Sanz. Vídevos, que vos ha prestar!
Outro Picaversos máxico o de onte. Mágoa que non nos foi posible gravar aos convidados, e non temos ningún recordo audiovisual da sesión dos FERID@S… Se cadra hai cousas que teñen que ser así: só para quen tivo a sorte destar nun lugar, nese momento. A noite única dun martes de outubro onde unhas sesenta persoas nos asomábamos á alma revelada de Eva, seguíamos os pasos apurados de Estevo e nos conmovíamos coa voz de Mónica.
As mans de Eva enléanse na súa propia voz e núa, esencial, recita poemas do seu último libro, A frecha azul do teixo, un poema inédito que dedicou a Margarita Ledo, un poema de Lois Pereiro e outro de Luisa Villalta. Nosoutros: respirala en absoluto asombramento, deixarse ir canda a ela.
Estevo: a súa música en construción para desbagullar textos de Marcos Lorenzo, Carlos Oroza, Celso Fernández Sanmartín, Fernando Arrabal, Luisa Castro e J. Carlos Valle “Karlotti”. E logo os seus propios lugares de area silvestre en lingua de licor café: estrelecidos animais vai ceibando que veñen a refuxiarse aos nosos petos.
E Mónica deitándonos a flor de pel o L’amento de Arianna (Monteverdi), o L’amento della ninfa (Monteverdi), If love’s a sweet passion (Purcell), Music for a While (Puecell) e a Voz soa (Mónica de Nut). Vibran os vasos, as cervexas, sentimos moverse lenemente as pedras milenarias sobre as que estamos sendo e de súpeto hai moitísima luz.
Aquí vos deixamos a folla volandeira que repartimos na sesión de onte:
Aquí a música picada: 96 tears (Question Mark and the Misterian), Magic Doors (Portishead), Hurt (versión de NIN de Johny Cash), Ashes do ashes (D. Bowie), My body is a cage (Arcade Fire).
Foi de novo un luxo e un pracer.
Aquí vos deixamos a primeira folla volandeira de PICAVERSOS coa nosa proposta de poemas INCORRUPTIBLES. Agardamos que vos gusten e que vos fagan ganas de vir esta noite á apertura do ciclo. Xa sabedes: Olga Novo, Lupe Gómez e Martin Wu, ás 21.00 h. no Modus Vivendi, farán a súa escolla INCORRUPTIBLE.
picaversos 